प्रतिनिधी, 4 ऑक्टोबर: जंतर मंतरजवळ सुरू असलेल्या आंदोलनाचे वार्तांकन करत असताना दिल्ली पोलिसांच्या (Delhi Police) एका वरिष्ठ पुरुष अधिकाऱ्याने आपला छळ केल्याचा आरोप दोन महिला पत्रकारांनी केला आहे. या घटनेनंतर छळ आणि हल्ल्याचा निषेध करण्यासाठी शेकडो पत्रकार पार्लमेंट स्ट्रीट पोलीस स्टेशनबाहेर जमले आहेत.
शनिवारी जंतर मंतर येथे झालेल्या आंदोलनादरम्यान जेव्हा आयसा कार्यकर्ती नेहा बोरा हिला बसमध्ये ताब्यात घेतले जात होते, तेव्हा आपण वार्तांकन करत असल्याचे एका महिला पत्रकाराने म्हटले आहे. दिल्ली पोलीस अधिकारी विवेक भगतने आपला विनयभंग केला आणि नंतर ढकलले, असा आरोप केला आहे. तसेच आपण तीन तासांहून अधिक काळ पार्लमेंट स्ट्रीट पोलीस स्टेशनमध्ये बसून असल्याचेही तिने सांगितले.
या घटनेवर कॉकरोच जनता पक्षाचे संस्थापक अभिजीत दिपके यांनी व्हिडिओतून संताप व्यक्त केला आहे. महिलांची सुरक्षा ही अत्यंत महत्त्वाची आणि तडजोड न करण्यासारखी बाब असून याबाबत गुन्हा दाखल केला पाहिजे, अशी मागणी त्यांनी केली. विवेक भगत यांनी महिला पत्रकारासोबत गैरवर्तन केले असून जंतरमंतरवर लाठीचार्ज करणारे सचिन शर्मा आता विवेक भगत यांना वाचवत आहेत का, असा सवाल दिपके यांनी उपस्थित केला. महिला तक्रार दाखल करण्यासाठी गेली असता तिची तक्रार ऐकून घेतली नाही आणि आंदोलन करणाऱ्या पत्रकारांनाच ताब्यात घेतले जात असल्याबाबत त्यांनी प्रश्नचिन्ह निर्माण केले.
कॉकरोच जनता पार्टीचे सह-संयोजक आशुतोष रांका यांनी एक्सवरील एका पोस्टमध्ये दिल्ली पोलिसांवर टीका केली आहे. दिल्ली पोलिसांच्या अधिकाऱ्यांकडून छळ आणि मारहाणीचा आरोप करत शेकडो पत्रकार पार्लमेंट स्ट्रीट पोलीस स्टेशनबाहेर आंदोलन करत आहेत. सचिन शर्मासारख्यांनी भरलेली दिल्ली पोलीस, झपाट्याने राष्ट्रीय शरमेची पोलीस बनत आहे, असे रांका यांनी म्हटले आहे.
