प्रतिनिधी, 14 ऑक्टोबर: बॉलिवूडमध्ये आपल्या नृत्याने आणि अभिनयाने ओळख निर्माण करणारी ४२ वर्षीय अभिनेत्री ईशा शरवानी सध्या चित्रपटसृष्टीपासून दूर आहे. चित्रपटांपेक्षा तिच्या वैयक्तिक आयुष्याची आणि विशेषतः एका क्रिकेटपटूसोबतच्या तिच्या अफेअरची इंडस्ट्रीत सर्वाधिक चर्चा झाली होती.
ईशाने २००५ मध्ये सुभाष घई दिग्दर्शित ‘किसना’ या चित्रपटातून विवेक ओबेरॉयसोबत बॉलिवूडमध्ये पदार्पण केले होते. यानंतर ती 'यू मी और हम', 'दरवाजा बंद रखो', 'लक बाय चान्स' आणि 'करीब करीब सिंगल' यांसारख्या हिंदी चित्रपटांमध्ये दिसली. याशिवाय तिने काही तमिळ आणि मल्याळम चित्रपटांमध्येही काम केले. मात्र, तिचा मोठ्या पडद्यावरील हा प्रवास फार काळ टिकला नाही आणि हळूहळू ती अभिनयापासून दूर गेली.
ईशाचे नाव भारतीय क्रिकेट संघाचा माजी वेगवान गोलंदाज झहीर खानसोबत जोडले गेले होते. हे दोघे जवळपास आठ वर्षे रिलेशनशिपमध्ये होते. त्यांच्या लग्नाच्या बातम्याही अनेकदा आल्या होत्या, मात्र त्यांच्या नात्यावर दोघांपैकी कोणीही कधीही सार्वजनिकरीत्या स्पष्टीकरण दिले नाही. अनेक वर्षे चर्चेत राहिलेले हे नाते अखेर लग्नापर्यंत पोहोचू शकले नाही.
सध्या ईशा अभिनयापासून दूर असली तरी तिने आपली नृत्याची आवड जपली आहे. ती एक कुशल नृत्यांगना असून एरियल डान्समध्ये तिने प्रावीण्य मिळवले आहे. जगभरातील प्रेक्षकांसमोर थेट नृत्याचे कार्यक्रम करण्यावर तिचा भर असून ती नृत्याचे प्रशिक्षणही देते. सध्या ईशा ऑस्ट्रेलियात राहत असून ती सिंगल पॅरेन्ट म्हणून आपल्या मुलाचा सांभाळ करत आहे. तिच्या वैयक्तिक आयुष्याबद्दलची अधिक माहिती सार्वजनिकरीत्या उपलब्ध नाही.
