प्रतिनिधी, 14 ऑक्टोबर: दुष्काळाच्या झळा सोसणाऱ्या राज्यातील शेतकऱ्यांसाठी राज्य सरकारने एक महत्त्वपूर्ण आणि मोठा निर्णय घेतला आहे. मुख्यमंत्री देवेंद्र फडणवीस यांनी दुष्काळग्रस्त शेतकऱ्यांना तातडीचा दिलासा म्हणून प्रत्येकी ५ हजार रुपयांची आर्थिक मदत देण्याची घोषणा केली आहे. सणासुदीच्या काळात बळीराजाला आधार देण्यासाठी ही रक्कम दिवाळीच्या आधीच थेट शेतकऱ्यांच्या बँक खात्यात जमा केली जाणार आहे.
राज्य मंत्रिमंडळाच्या बैठकीनंतर प्रसारमाध्यमांशी संवाद साधताना मुख्यमंत्र्यांनी या निर्णयाची माहिती दिली. ते म्हणाले की, गेल्या २५ वर्षांच्या इतिहासात राज्यात साधारणपणे नोव्हेंबर महिन्यात दुष्काळ जाहीर केला जात होता आणि शेतकऱ्यांना डिसेंबरमध्ये मदत मिळायची. मात्र, यंदा शासनाने जलद पावले उचलत ऑक्टोबरमध्येच दुष्काळाचा शासन निर्णय (जीआर) काढला आहे. यासोबतच आज पुरवणी जीआर काढून १२ विविध योजनाही लागू करण्यात आल्या आहेत.
सध्या ऐन दिवाळीच्या तोंडावर शेतकरी आर्थिक अडचणीत सापडला आहे. अशा परिस्थितीत केंद्राकडून मदत मिळण्यासाठी विशिष्ट कार्यप्रणाली आणि नियम असतात. या प्रक्रियेत काही टप्पे पार करावे लागत असल्याने दिवाळीपूर्वी केंद्राची मदत हातात पडणे कठीण आहे. नेमकी हीच तांत्रिक अडचण लक्षात घेऊन आजच्या मंत्रिमंडळ बैठकीत शेतकऱ्यांना तात्काळ मदत देण्यावर सविस्तर चर्चा करण्यात आली.
केंद्राकडून मिळणारा निधी प्राप्त झाल्यानंतर तो नियमानुसार दिला जाईलच, परंतु त्याआधी सणासुदीला शेतकऱ्यांच्या हातात काहीतरी रक्कम असावी, या हेतूने ५ हजार रुपयांची अग्रीम (अॅडव्हान्स) मदत देण्याचा निर्णय सरकारने घेतला आहे. या निर्णयाची तत्काळ अंमलबजावणी केली जाणार असून, दिवाळीपूर्वीच ही मदत शेतकऱ्यांपर्यंत पोहोचेल, अशी ग्वाही देवेंद्र फडणवीस यांनी दिली आहे.
