प्रतिनिधी, 14 ऑक्टोबर: मुख्य निवडणूक आयुक्त ज्ञानेश कुमार यांच्या राजीनाम्याच्या मागणीवरून देशभरात आंदोलने सुरू असतानाच, आता महाराष्ट्र नवनिर्माण सेनेच्या नेत्या शर्मिला ठाकरे यांनीही त्यांच्यावर जोरदार निशाणा साधला आहे. "काम आपण करतो, पण ज्ञानेश कुमार यांच्या कृपेने दुसरेच निवडून येतात; आता हे बंद करायचं आहे," असे अत्यंत सूचक आणि मोठे विधान त्यांनी जेजुरी येथे केले आहे.
जेजुरीमध्ये एका कार्यकर्त्याच्या दुकानाच्या उद्घाटनासाठी आल्या असताना शर्मिला ठाकरे यांनी पक्षाच्या पदाधिकाऱ्यांशी संवाद साधला. खऱ्या अर्थाने काम करणाऱ्या लोकांसाठी जेजुरीच्या खंडेरायाला नवस बोलण्याचे आवाहन त्यांनी यावेळी केले. तसेच त्यांनी राज्यातील भीषण दुष्काळी संकटावरही भाष्य केले.
प्रवासादरम्यान रस्त्याच्या दुतर्फा करपलेली पिके पाहिल्याचे सांगत, ऊस उत्पादक शेतकऱ्यांनाही त्यांच्या पिकाचा योग्य भाव मिळत नसल्याची खंत शर्मिला ठाकरे यांनी व्यक्त केली. शेतकऱ्यांवरील हे मोठे संकट दूर व्हावे यासाठी आपण आई अंबेला प्रार्थना करत असल्याचेही त्या म्हणाल्या.
दुसरीकडे, मुख्य निवडणूक आयुक्त ज्ञानेश कुमार यांच्या विरोधात गेल्या १५ दिवसांपासून देशातील विविध राज्यांमध्ये मोठी आंदोलने सुरू आहेत. राजधानी दिल्ली या आंदोलनांची रणभूमी ठरली असून, गेल्या दहा दिवसांत काँग्रेसने तिथे जोरदार निदर्शने केली आहेत. जोपर्यंत निवडणूक आयुक्तांचा राजीनामा होत नाही, तोपर्यंत आंदोलनाची धार तीव्रच राहील, अशी स्पष्ट भूमिका काँग्रेस नेते राहुल गांधी यांनी मांडली आहे. तसेच 'कॉकरोच जनता पार्टी'नेही आक्रमक पवित्रा घेत सरकारला जेरीस आणले आहे.
निवडणूक आयोगाविरोधातील हा संघर्ष आता मुंबईतही अधिक तीव्र झाला आहे. ज्ञानेश कुमार यांच्या राजीनाम्यासाठी दोन दिवसांपूर्वीच मुंबईतील शिवाजी पार्कवर 'सीजेपी'च्या समर्थनार्थ मोठे आंदोलन करण्यात आले. या आंदोलनात ठाकरे गट (उद्धव सेना), मनसे आणि सीजेपीचे कार्यकर्ते मोठ्या संख्येने सहभागी झाले होते.
विशेष म्हणजे या आंदोलनात आदित्य ठाकरे आणि अमित ठाकरे यांच्यासह तेजस ठाकरे हेदेखील रस्त्यावर उतरलेले पाहायला मिळाले. या उग्र आंदोलनादरम्यान पोलिसांनी अनेक कार्यकर्त्यांना ताब्यात घेतले असून, शिवाजी पार्कवरील या घडामोडींमुळे निवडणूक आयोगाविरोधातील राजकीय वातावरण आणखी तापले आहे.
