प्रतिनिधी, 13 ऑक्टोबर: महाराष्ट्रातील एसआयआर-२०२६ (SIR-2026) प्रारूप मतदार यादीत तब्बल २ लाख ७० हजार ३१३ मतदारांचे जन्मवर्ष चुकून १९०० असे नोंदवले गेल्याचा धक्कादायक प्रकार समोर आला होता. या मोठ्या तांत्रिक चुकीमुळे मसुदा यादीत संबंधित मतदारांचे वय १०१ ते १५० वर्षांच्या दरम्यान दिसत होते. राज्याच्या मुख्य निवडणूक अधिकारी कार्यालयाने हा विषय लावून धरल्यानंतर, महिनाभराच्या पाठपुराव्याअंती भारतीय निवडणूक आयोगाने ही तांत्रिक चूक अखेर दुरुस्त केली आहे.
या घोळाचा सर्वाधिक फटका नाशिक जिल्ह्याला बसला होता. मिळालेल्या आकडेवारीनुसार, नाशिक जिल्ह्यातील कळवण (अनुसूचित जमाती), चांदवड आणि देवळाली (अनुसूचित जमाती) या तीन विधानसभा मतदारसंघांमध्ये तब्बल २,३७,९७४ (सुमारे ८८ टक्के) मतदारांच्या वयाची चुकीची नोंद झाली होती. तर, उर्वरित ३२,३३९ मतदार राज्याच्या इतर भागांतील होते. एवढ्या मोठ्या संख्येने लोक अचानक अतिवृद्ध दिसू लागल्याने निवडणूक डेटाच्या अचूकतेवर प्रश्नचिन्ह निर्माण झाले होते.
ही त्रुटी मूळ मतदार यादीतच होती की सुधारणा प्रक्रियेदरम्यान झाली, याची माहिती राज्याच्या मुख्य कार्यकारी अधिकाऱ्यांच्या कार्यालयाने निवडणूक आयोगाकडे मागितली होती. यासाठी सीमा खन्ना यांच्या नेतृत्वाखालील माहिती तंत्रज्ञान विभागाला २ सप्टेंबर रोजी एक्सेल शीट स्वरूपात एसआयआर-पूर्व याद्या आणि एसआयआर-२०२६ मधील जन्मतारखांचा तपशील देण्याची विनंती करण्यात आली होती. त्यानंतर ८ सप्टेंबर रोजी दुसरी विनंती करण्यात आली.
या दोन विनंत्यांनंतरही माहिती उपलब्ध न झाल्याने, अखेर १७ सप्टेंबर रोजी राज्याचे मुख्य निवडणूक अधिकारी एस. चोकलिंगम यांनी वरिष्ठ उपनिवडणूक आयुक्त मनीष गर्ग यांना पत्र लिहिले. माहिती तंत्रज्ञान विभागाला तातडीने आवश्यक तपशील देण्याचे निर्देश देण्याची मागणी त्यांनी या पत्रात केली. मसुदा यादीत राज्यातील विविध मतदारसंघांतील पावणेतीन लाख मतदारांचे वय १०१ ते १५० वर्षे नोंदवले गेल्याचे त्यांनी पत्रात स्पष्ट केले होते. या सर्व प्रक्रियेनंतर निवडणूक आयोगाने तांत्रिक त्रुटीची दखल घेत जन्मवर्षातील तफावत दूर केली आहे.
📌 महत्वाच्या बातम्या
- वंदना गुप्ते यांनी सीकेपी मुलाशी लग्न केल्याने बाळासाहेबांना झाला होता आनंद, अभिनेत्रीने सांगितल्या जुन्या आठवणी
- अभिनेत्री सेलिना जेटलीचे पतीवर घरगुती हिंसाचाराचे आरोप; म्हणाली, ‘खर्चासाठी सफाई कामगाराची नोकरी करण्याचा सल्ला’
- प्रदीप पूर्णेकर हत्या प्रकरण: जुना व्हिडिओ समोर, माजी महापौर मीनाक्षी शिंदेंची चौकशी होणार
