प्रतिनिधी, 13 ऑक्टोबर: सुप्रसिद्ध आणि स्पष्टवक्तेपणासाठी ओळखल्या जाणाऱ्या मराठी अभिनेत्री वंदना गुप्ते यांचे ठाकरे कुटुंबाशी अत्यंत जिव्हाळ्याचे संबंध आहेत. नुकत्याच 'महाराष्ट्र टाइम्स ऑनलाईन'ला दिलेल्या एका मुलाखतीत त्यांनी शिवसेनाप्रमुख बाळासाहेब ठाकरे यांच्याविषयीच्या अनेक जुन्या आठवणींना उजाळा दिला. आपण सीकेपी कुटुंबात लग्न केल्याचे समजल्यावर बाळासाहेबांना खूप आनंद झाला होता, असा किस्सा त्यांनी यावेळी सांगितला.
आपल्या आईला क्रिकेटची प्रचंड आवड होती, असे सांगताना गुप्ते यांनी ब्रेबॉर्न स्टेडियमवरचा एक प्रसंग सांगितला. एकदा त्या आणि त्यांची आई तिथे सामना पाहण्यासाठी जात असताना त्यांना बाळासाहेब ठाकरे भेटले. ते स्वतःही तो सामना पाहायला चालले होते. गुप्ते यांचे स्टेडियममधील तिकीट वेगळ्या जागेचे असूनही बाळासाहेबांनी त्यांना आपल्यासोबत नेले. त्यानंतर बाळासाहेब जेव्हा कधी मॅचला जायचे, तेव्हा आवर्जून विचारपूस करायचे आणि मग त्या दोघीही त्यांच्यासोबत जायच्या, अशी आठवण त्यांनी सांगितली.
वंदना गुप्ते यांनी एका सीकेपी मुलाशी लग्न केल्यामुळे बाळासाहेबांना विशेष आनंद झाला होता. लग्नानंतर वंदना, त्यांचे पती शिरीष, बाळासाहेब आणि इतर दोन-तीन जणांचा मिळून एक ग्रुप तयार झाला होता. हा ग्रुप वर्ल्डकपच्या शेवटच्या तीन मॅचेस कायम एकत्र पाहायचा. कधी बाळासाहेबांच्या घरी तर कधी गुप्ते यांच्या घरी, असे नियोजन करून त्यांनी अनेक क्रिकेट सामन्यांचा आनंद लुटल्याचे गुप्ते यांनी सांगितले.
दरवर्षी बाळासाहेबांना वाढदिवसाच्या शुभेच्छा देण्यासाठी कलानगर येथील त्यांच्या निवासस्थानी जात असल्याची आठवणही वंदना गुप्ते यांनी सांगितली. त्यावेळी तिथे शुभेच्छा देण्यासाठी प्रचंड मोठी गर्दी असायची. आपल्याकडे बाळासाहेबांचे बरेच जुने फोटो असल्याचे सांगून गुप्ते म्हणाल्या की, लोकांचा त्यांच्यावर खूप जीव होता आणि त्यांनीही महाराष्ट्रासाठी मोठे काम केले आहे.
