प्रतिनिधी, 13 ऑक्टोबर: अभिनेता सुशांत सिंह राजपूत याच्या मृत्यूप्रकरणी अभिनेत्री तनुश्री दत्ता हिने नाना पाटेकर यांच्यावर गंभीर आरोप केले आहेत. सुशांतच्या मृत्यूच्या दिवशीच नाना पाटेकर त्याच्या पाटण्यातील घरी पोहोचले होते, असा खळबळजनक दावा तनुश्रीने एका मुलाखतीत केला आहे. मात्र, प्रसारमाध्यमांचे अहवाल आणि अधिकृत नोंदींनुसार तिने केलेला हा दावा पूर्णपणे चुकीचा असल्याचे फॅक्ट चेकमध्ये समोर आले आहे.
नाना पाटेकरांच्या वेळापत्रकावर प्रश्नचिन्ह उपस्थित करताना तनुश्री म्हणाली की, "ज्या दिवशी सुशांतने टोकाचे पाऊल उचलले, त्या दिवशी सकाळी ९.३० वाजता त्याची खोली उघडी होती आणि १० वाजेपर्यंत कुटुंबाला अभिनेत्याच्या निधनाची माहिती मिळाली. पण नाना पाटेकर त्याच दिवशी सकाळी १० वाजता सुशांतच्या पाटण्यातील घरी पोहोचले होते. ते इतक्या लवकर सुशांतच्या घरी कसे पोहोचले? पुढे काय होणार आहे, हे त्यांना आधीच माहिती होते का?"
या दाव्याची पडताळणी केली असता त्यामध्ये कोणतेही तथ्य आढळले नाही. १४ जून २०२० रोजी सुशांतचे निधन झाले, तेव्हा देशात कोरोना महामारी होती आणि लॉकडाऊन व प्रवासाचे कडक नियम लागू होते. मृत्यूची बातमी मिळताच सुशांतचे वडील के. के. सिंह आणि त्यांचे कुटुंबीय सुशांतला अखेरचा निरोप देण्यासाठी मुंबईला रवाना झाले.
दुसऱ्या दिवशी, म्हणजेच १५ जून २०२० रोजी मुंबईतील विलेपार्ले येथील स्मशानभूमीत सुशांतवर अंत्यसंस्कार करण्यात आले. कुटुंबीय मुंबईसाठी निघाल्यामुळे १४ जूनच्या सकाळी पाटण्यातील घरी कोणाचेही जाण्याचे काहीच कारण नव्हते.
अधिकृत प्रसारमाध्यमांच्या नोंदी आणि प्रत्यक्ष घटनास्थळावरील वृत्तांनुसार, सुशांतच्या निधनाच्या दिवशी नाना पाटेकर तिथे गेलेच नव्हते. ते तब्बल १४ दिवसांनंतर, म्हणजेच २८ जून २०२० रोजी रविवारी पाटण्यात पोहोचले होते.
'सेंट्रल रिझर्व्ह पोलीस फोर्स'ने (CRPF) बिहारमधील मोकामा येथे एका कल्याणकारी कार्यक्रमाचे आयोजन केले होते, त्यासाठी नाना पाटेकर तिथे आले होते. सीआरपीएफ जवानांची भेट आणि कार्यक्रम संपल्यानंतर २८ जूनच्या दुपारी त्यांनी पाटण्यातील राजीव नगर येथील सुशांतच्या निवासस्थानी भेट दिली. यावेळी त्यांनी सुशांतच्या वडिलांची भेट घेऊन अभिनेत्याला फुले अर्पण करत श्रद्धांजली वाहिली.
