पुणे, 13 ऑक्टोबर: उपमुख्यमंत्री सुनेत्रा पवार यांनी सोमेश्वर सहकारी साखर कारखान्याच्या निवडणुकीत निर्विवाद यश मिळवले आहे. अजित पवार यांच्या निधनानंतर सहकार क्षेत्रात झालेली ही पहिलीच मोठी निवडणूक होती. जुन्या निष्ठावंतांचे बंड मोडून काढत सुनेत्रा पवारांनी आपले नेतृत्व ठामपणे सिद्ध केले आहे.
या कारखान्यावर १९९२ सालापासून अजित पवारांचे वर्चस्व राहिले होते. मात्र, त्यांच्या मृत्यूनंतर आठ महिन्यांच्या आतच विद्यमान अध्यक्ष आणि जुने निष्ठावंत पुरूषोत्तम जगताप यांनी राष्ट्रवादी काँग्रेसची साथ सोडली व स्वतःचे वेगळे पॅनेल निवडणुकीत उतरवले. दुसरीकडे शरद पवार गटाकडून युगेंद्र पवार यांनीही एका पॅनेलचे नेतृत्व केले. परंतु, सभासदांनी या दोन्ही पॅनेलना नाकारत सुनेत्रा पवारांच्या बाजूने स्पष्ट कौल दिला.
या प्रतिष्ठेच्या निवडणुकीत सुनेत्रा पवार यांनी जय पवार यांच्या साथीने प्रचाराची धुरा स्वतःच्या हाती घेतली होती. त्यांनी कारखान्याच्या कार्यक्षेत्रातील प्रत्येक गावात जाऊन सभासदांशी थेट संवाद साधला. राज्यातील सत्तेचा उपयोग करून कारखान्याच्या विकासाला गती देण्याचे आश्वासन त्यांनी दिले, ज्याला मतदारांनी सकारात्मक प्रतिसाद दिला.
पुरुषोत्तम जगताप यांचा कारखान्यातील अनुभव मोठा असला तरी ऐन निवडणुकीत त्यांनी घेतलेली वेगळी राजकीय भूमिका सभासदांना पसंत पडली नाही. याउलट, अजित पवारांबद्दलची सहानुभूती आणि निष्ठा या निवडणुकीत निर्णायक ठरली. विशेष म्हणजे, उमेदवारी निश्चित करताना जगताप यांनी ज्यांना विरोध केला होता, ते संचालक उमेदवारही मोठ्या मताधिक्याने विजयी झाले.
अजित पवारांनंतर बारामतीचे राजकारण आणि सहकार क्षेत्र सुनेत्रा पवार समर्थपणे सांभाळू शकतात, हा स्पष्ट संदेश या निकालातून गेला आहे. सत्तेची नवी समीकरणे तयार करणारा हा विजय त्यांच्या पुढील राजकीय वाटचालीसाठी अत्यंत महत्त्वाचा टप्पा मानला जात आहे.
