प्रतिनिधी, 14 ऑक्टोबर: पुणे विधानपरिषद निवडणुकीच्या पार्श्वभूमीवर घडलेल्या नाट्यमय घडामोडींनंतर एकनाथ शिंदे नाराज असल्याच्या चर्चांना उधाण आले होते. यावर देवेंद्र फडणवीस यांनी मिश्किल प्रतिक्रिया देत या केवळ अफवा असल्याचे स्पष्ट केले आहे.
पुण्यातील दोन जागांसाठी भाजप आणि शिंदेसेनेत संघर्ष पाहायला मिळाला होता. शिंदेसेनेकडून मंगेश चिवटे यांनी उमेदवारी अर्ज दाखल केला होता, तर भाजपनेही अधिकृत उमेदवार दिला होता. मात्र, नंतर चिवटे यांनी आपला अर्ज मागे घेतल्याने एकनाथ शिंदे नाराज असल्याची चर्चा सुरू झाली. निवडणुकीसंदर्भात आज झालेल्या बैठकीनंतर फडणवीस यांनी माध्यमांशी संवाद साधला.
यावर बोलताना फडणवीस म्हणाले, 'शिंदेसाहेब नाराज नाहीत. तुम्ही सगळे नाराज आहात. त्यामुळे त्यांच्याविषयी विनाकारण अफवा पसरवू नका.' यावेळी त्यांनी पुण्यासाठी एका मोठ्या निर्णयाची घोषणाही केली. पुण्यात नव्या मेडिकल कॉलेजच्या जागांना मंजुरी मिळाली असून, ईएसआयसी (ESIC) रुग्णालयाचा दर्जा वाढवण्यासाठी केंद्रीय मंत्र्यांनी ५० एमबीबीएस जागांसह रुग्णालयाला मान्यता दिली आहे.
या मंजुरीसाठी माधुरीताई आणि मुरली अण्णा सातत्याने प्रयत्न करत होते, असे सांगत त्यांनी पंतप्रधान मोदी आणि जे. पी. नड्डा यांचे आभार मानले. विधानपरिषद निवडणुकीबाबत बोलताना त्यांनी सांगितले की, पुणे पदवीधर मतदारसंघात भैय्या माने आणि शरद लाड यांनी स्मिता जाधव यांच्या पाठीशी उभे राहण्याचा निर्णय घेतला आहे.
पश्चिम महाराष्ट्रातील सर्व जिल्ह्यांमध्ये भाजपचे आमदार, पदाधिकारी आणि कार्यकर्ते मतदारांपर्यंत पोहोचण्याचे काम करतील. पुणे आणि अमरावती शिक्षक मतदारसंघासह विधानपरिषदेच्या पाचही जागांवर महायुतीचे उमेदवार विजयी होतील, असा विश्वास त्यांनी व्यक्त केला. तसेच सचिन सानप हे अपक्ष म्हणून निवडणूक लढवत असल्याचेही त्यांनी नमूद केले.
कोणाची कोणाशी कितीही जवळीक असली तरी शिवसेना, भाजप आणि राष्ट्रवादीचे आमदार व नगरसेवक भाजपचेच काम करतील, असे फडणवीस यांनी स्पष्ट केले. आजच्या बैठकीत सर्व आमदार आणि नगरसेवक उपस्थित होते. निवडणूक पूर्ण ताकदीने लढावी लागते, त्यामुळे सर्वांकडून कामाची काय अपेक्षा आहे, हे आपण स्पष्ट केल्याचे त्यांनी सांगितले.
📌 महत्वाच्या बातम्या
- ‘कुछ-कुछ होता है’ च्या सेटवर सलमानच्या ‘त्या’ हट्टामुळे करण जोहरला कोसळले होते रडू, नेमकं काय घडलं?
- अमिताभ बच्चन यांच्यापेक्षा १ रुपया जास्त मानधन; कमलेश सावंत यांनी सांगितला नाना पाटेकरांचा ‘तो’ भन्नाट किस्सा
- कॉकरोच जनता पार्टी आक्रमक; नेत्यांच्या अटकेनिषेधार्थ अभिजीत दिपकेंकडून ‘लेहरा दो तिरंगा’ मार्चची मोठी घोषणा
