प्रतिनिधी, 15 ऑक्टोबर: भारतीय संघाचा अष्टपैलू खेळाडू विराट कोहलीची फटकेबाजी पाहण्यासाठी क्रिकेटप्रेमी नेहमीच उत्सुक असतात. अनेक खेळाडू त्याच्या फलंदाजीचे चाहते असून काहींनी तर त्याची फलंदाजी पाहून क्रिकेट विश्वात स्वतःचे नाव कमावले आहे. मात्र, कॉकरोच जनता पार्टीचे (CJP) संस्थापक अभिजीत दिपके हे विराटच्या एका शतकानंतर दु:खी झाले होते. त्यावेळी त्यांनी आंतरराष्ट्रीय क्रिकेट परिषदेला (ICC) एक कमकुवत संस्था म्हटले होते. दिपके यांची ही जुनी सोशल मीडिया पोस्ट सध्या पुन्हा एकदा चर्चेत आली आहे.
काही वर्षांपूर्वी खेळल्या गेलेल्या एका सामन्यात विराट कोहलीने तुफानी शतक झळकावत भारतीय संघाला विजय मिळवून दिला होता. मात्र, त्याच सामन्यात पंचांनी घेतलेल्या एका निर्णयावरून क्रिकेट वर्तुळात बराच वाद निर्माण झाला होता. त्यावरून भारताच्या बाजूने पक्षपात केला जात असल्याच्या संमिश्र प्रतिक्रिया उमटल्या होत्या. या संपूर्ण प्रकारावर अभिजीत दिपके यांनी तीव्र नाराजी व्यक्त केली होती. सामन्यात पंचांकडून असे चुकीचे निर्णय दिले गेले आणि विशिष्ट खेळाडूला अथवा संघाला झुकते माप मिळाले, तर त्याचा फायदा खेळाडूच्या कामगिरीवर होतो आणि खेळातील निष्पक्षताही धोक्यात येते, असे मत त्यांनी मांडले होते. तसेच अशा सामन्यात उत्तुंग कामगिरी करूनही विराटला पक्षपातीपणे बाद करण्याच्या निर्णयावर दिपके यांनी उपरोधिक टीका केली होती.
दिपके यांनी १९ ऑक्टोबर २०२३ रोजी केलेल्या पोस्टमध्ये म्हटले होते, “कोहलीचे शतक पूर्ण व्हावे यासाठी पंचांनी स्पष्ट वाईड देण्यास नकार दिला. बीसीसीआयसमोर आयसीसी ही एक कमकुवत (टूथलेस) संस्था आहे, असे अर्जुन रणतुंगा म्हणाले होते ते चुकीचे नव्हते. एखाद्या विशिष्ट संघासाठी नियमांचा वेगळा संच असू शकत नाही.”
याच वादावरून अभिजीत दिपके यांनी जागतिक क्रिकेट परिषदेच्या कार्यपद्धतीवर थेट ताशेरे ओढले होते. नियमांची कडक अंमलबजावणी करण्यात आयसीसी अपयशी ठरल्याचा ठपका त्यांनी ठेवला. आयसीसी ही एक दुबळी संस्था असून ती बड्या क्रिकेट मंडळांच्या आणि खेळाडूंच्या इशाऱ्यावर तसेच दबावाखाली काम करत असल्याचा दावा त्यांनी केला. कोणत्याही एका खेळाडूसाठी किंवा संघासाठी नियमांमध्ये शिथिलता दाखवली जाऊ शकत नाही, अशी भूमिका त्यांनी घेतली होती.
दरम्यान, सीजेपीचे नेते आशुतोष रांका आणि सौरव दास यांना जंतरमंतरवरील आंदोलनामुळे पोलिसांनी नुकतेच ताब्यात घेऊन तिहार तुरुंगात पाठवले आहे. या कारवाईच्या निषेधार्थ अभिजीत दिपके हे उद्या दिल्लीमध्ये तिरंगा आंदोलन करणार असून त्यांनी नागरिकांना यात सहभागी होण्याचे आवाहन केले आहे. या घडामोडींच्या पार्श्वभूमीवर क्रिकेट जगताशी संबंधित त्यांची ही जुनी पोस्ट समाजमाध्यमांवर वेगाने व्हायरल होत आहे.
📌 महत्वाच्या बातम्या
- थंडीमुळे ओठ पडले निळे, तरीही शूट झाले २६ वर्षांपूर्वीचे गाणे; अलास्कातील शूटिंगदरम्यान माधुरी दीक्षितची झाली होती बिकट अवस्था
- शेतकऱ्यांना ५ हजारांची मदत ही अन्नदात्याची थट्टा; रोहित पवारांचा सरकारवर घणाघात
- डोंबिवली-नवी मुंबई प्रवास १५ मिनिटांत; ऐरोली-काटई उन्नत मार्ग ऑक्टोबर अखेरीस सुरू होण्याची शक्यता
