प्रतिनिधी, 13 ऑक्टोबर: अभिनेता इमरान हाशमीच्या आगामी 'गनमास्टर G9' या चित्रपटाच्या शूटिंगदरम्यानचा एक थरारक व्हिडीओ सध्या सोशल मीडियावर व्हायरल होत आहे. या व्हिडीओमध्ये हवेत उलटलेली एक एसयूव्ही कार खाली उभ्या असलेल्या व्हॅनवर वेगाने आदळताना दिसत आहे. या भयानक स्टंटदरम्यान इमरान हाशमी थोडक्यात बचावल्याची चर्चा सुरू असली, तरी याबाबत अद्याप कोणतीही अधिकृत माहिती समोर आलेली नाही.
व्हायरल झालेल्या या बीटीएस (BTS) व्हिडीओमध्ये एका मोकळ्या मैदानात स्टंटचे चित्रीकरण सुरू असल्याचे पाहायला मिळते. एका मोठ्या क्रेनच्या साहाय्याने एसयूव्ही कार हवेत लटकवली जाते. उपस्थितांकडून उलटी गणती झाल्यानंतर, क्रेनला बांधलेली ही कार अचानक हवेत गोल फिरते आणि खाली असलेल्या काळ्या रंगाच्या व्हॅनच्या टपावर जोरात आपटते. हा प्रसंग घडताच सेटवर उपस्थित असलेले चित्रपटाशी संबंधित लोक आणि बघे कारच्या दिशेने धाव घेताना दिसतात.
या स्टंटच्या वेळी इमरान हाशमी तिथेच उपस्थित होता आणि ही कार त्याच्या चेहऱ्याच्या अगदी जवळून गेल्याचा दावा केला जात आहे. सुदैवाने यात कोणतीही दुर्घटना घडली नाही आणि इमरान थोडक्यात बचावला. मात्र, व्हायरल व्हिडीओमध्ये इमरान कुठेही दिसत नसल्याने तो तिथे उपस्थित होता की नाही, याची पुष्टी होऊ शकलेली नाही. चित्रपटाच्या टीमकडूनही या वृत्ताला अद्याप दुजोरा देण्यात आलेला नाही.
'आवारापन २' च्या यशानंतर इमरान हाशमी आता 'गनमास्टर G9' या रोमँटिक ॲक्शन चित्रपटातून प्रेक्षकांच्या भेटीला येत आहे. या चित्रपटात त्याच्यासोबत जेनेलिया डिसूझा मुख्य भूमिकेत आहे. हा चित्रपट येत्या २७ नोव्हेंबर रोजी प्रदर्शित होणार आहे. विशेष म्हणजे याच दिवशी सूरज बडजात्या दिग्दर्शित आणि आयुष्मान खुरानाची मुख्य भूमिका असलेला 'ये प्रेम मोल' हा चित्रपटही रिलीज होणार असल्याने बॉक्स ऑफिसवर या दोन्ही चित्रपटांची टक्कर पाहायला मिळणार आहे.
