प्रतिनिधी, 13 ऑक्टोबर: प्रसिद्ध मराठमोळ्या अभिनेत्री प्रिया बेर्डे यांनी नुकताच त्यांच्या हॉटेल व्यवसायातील एक किस्सा शेअर केला आहे. पुण्यात हॉटेल चालवत असताना भट्टीवर रोटी बनवताना हाताला कसे चटके बसले, याचा अनुभव त्यांनी एका मुलाखतीत सांगितला.
'राजश्री मराठी'च्या एका पॉडकास्टमध्ये बोलताना त्यांनी या आठवणींना उजाळा दिला. पुण्यात त्यांचे हॉटेल असताना त्यांनी रोटी बनवण्यास शिकून घेतले होते. यासाठी पिंपासारखी एक भट्टी तयार करण्यात आली होती, ज्याला आतून माती लावली होती.
या भट्टीमध्ये वाकून रोटी आत टाकावी लागत असे. बेर्डे यांनी हा प्रयोग दोन ते तीन वेळा करून पाहिला होता. याविषयी सांगताना त्या म्हणाल्या की, "माझ्या हाताला जाम चटके वगैरे लागले होते. ते आपलं कामच नाही."
हॉटेल व्यवसायात बायकांच्या तुलनेत पुरुषांची मक्तेदारी जास्त असल्याचे मतही त्यांनी यावेळी व्यक्त केले. पण तिथे आपण घरगुती पद्धतीचे जेवण योग्य प्रकारे सांभाळल्याचे त्या म्हणाल्या. खाण्याच्या सवयींमधील विरोधाभासावर बोलताना त्या म्हणाल्या की, लोक घरात हॉटेलसारखे जेवण करण्याचा प्रयत्न करतात आणि बाहेर गेल्यावर मात्र त्यांना घरगुती पद्धतीचे जेवण हवे असते.
