प्रतिनिधी, 13 ऑक्टोबर: 'ए मामू' या संवादातून प्रेक्षकांची मने जिंकणारा बॉलिवूड अभिनेता संजय दत्त त्याच्या चित्रपटांसोबतच खासगी आयुष्यामुळेही नेहमी चर्चेत असतो. मुंबईपासून ते दुबई आणि न्यूयॉर्कपर्यंत संजय दत्तची स्वतःची भव्य घरे आहेत. या तिन्ही घरांच्या डिझाईनमध्ये एक गोष्ट सामायिक आहे ती म्हणजे, तिथे काच आणि लाकडाचा वापर करून अतिशय सुंदर इंटिरिअर करण्यात आले आहे.
संजय दत्तचे मुंबईतील घर पाली हिल या उच्चभ्रू आणि पॉश परिसरात आहे, जिथे अनेक प्रसिद्ध बॉलिवूड कलाकार राहतात. अहवालानुसार, ज्या जागेवर आज तो आपल्या कुटुंबासह राहतो, तिथे पूर्वी त्याचे आई-वडील सुनील आणि नर्गिस दत्त यांचा 'अजिंठा' नावाचा बंगला होता. नंतर त्या जागेवर एक भव्य इमारत बांधण्यात आली असून, तिला 'इम्पीरियल हाईट्स' असे नाव देण्यात आले आहे.
या घरातील लिव्हिंग रूम अतिशय आरामदायी आणि स्टायलिश आहे. बेज रंगाच्या भिंती, तपकिरी रंगाचे सोफे आणि लाकडी फ्लोअरिंग यामुळे घराला एक वेगळाच लूक मिळतो. लिव्हिंग रूममधील मोठ्या एलईडी टीव्हीच्या मागे बसवलेले खास लाकडी पॅनेल घराची शोभा आणखी वाढवते. तसेच, लाकडाचे नैसर्गिक फिनिश आणि काचेचा वापर यामुळे घराला एक क्लासी, मोकळा आणि आधुनिक स्पर्श मिळाला आहे.
घराच्या सजावटीमध्ये संजय दत्तच्या आई-वडिलांच्या आठवणींनाही महत्त्वाचे स्थान देण्यात आले आहे. टीव्हीच्या मागच्या भिंतीवर आणि घरातील एका विशेष कोपऱ्यात सुनील व नर्गिस दत्त यांचे फोटो लावलेले आहेत. संजय दत्त आपला जास्तीत जास्त वेळ याच कोपऱ्यात घालवताना दिसतो.
घरातील पांढऱ्या रंगाचे चमकणारे मॉड्युलर किचन अत्यंत स्वच्छ आणि एस्थेटिक पद्धतीने सजवलेले आहे. स्वयंपाक करत असताना इतर कामेही आरामात करता येतील इतकी मोठी जागा या किचनमध्ये आहे. एकूणच हे घर एखाद्या महालासारखे भव्य असून, रॉयल आणि लग्झरी डिझाईनची आवड असणाऱ्यांसाठी ते नक्कीच लक्षवेधी ठरते.
📌 महत्वाच्या बातम्या
- मुक्ताईनगरमध्ये वैयक्तिक आरोप-प्रत्यारोपांचा भडका; ‘निखिलने असं काय पाहिलं की…’, आमदार चंद्रकांत पाटलांचा एकनाथ खडसेंवर गंभीर आरोप
- सारा तेंडुलकरने कुटुंबासोबत साजरा केला २९ वा वाढदिवस; पण ‘त्या’ एका कृतीवरून चाहते विचारतायत सवाल
- सर्वात मोठी बातमी ! मोदी सरकार सहा महिन्यात गाशा गुंडाळणार, संजय राऊतांचे मोठे भाकीत
