विरार, 4 ऑक्टोबर: विरार येथील स्पोर्ट्स कॉम्प्लेक्सच्या उद्घाटनावरून भाजप आणि सत्ताधारी बहुजन विकास आघाडीमध्ये सुरू असलेला राजकीय वाद एकाच दिवशी दोन स्वतंत्र सोहळ्यांनी चर्चेत आला. कार्यक्रमाच्या निमंत्रण पत्रिकेत भाजपचे खासदार डॉ. हेमंत सवरा यांचे नाव नसल्याने भाजपने तीव्र नाराजी व्यक्त केली. हा थेट राजशिष्टाचाराचा भंग असल्याचा आरोप करत भाजपने स्वतंत्रपणे उद्घाटनाचा कार्यक्रम जाहीर केला. शनिवारी सकाळी सुमारे अकरा वाजता कडक पोलीस बंदोबस्त असतानाही खासदार डॉ. हेमंत सवरा, आमदार राजन नाईक, आमदार स्नेहा दुबे-पंडित आणि भाजपच्या नगरसेवकांनी संकुलात प्रवेश केला.
सकाळी दहा वाजल्यापासून सुरू असलेल्या या राजकीय रणकंदनानंतर दुपारी चार वाजता भाजपकडून स्पोर्ट्स कॉम्प्लेक्सची फीत कापून उद्घाटन करण्यात आले. त्यानंतर भाजपचे पदाधिकारी आणि कार्यकर्ते तेथून निघून गेले. या संपूर्ण वादात शिवसेना शिंदे गटाचाही सहभाग होता. शिंदे गटाचे नेते आणि आमदार रवींद्र पाठक यांनी स्पोर्ट्स कॉम्प्लेक्सला भेट दिली, ज्यामुळे या प्रकरणाला नवा राजकीय ट्विस्ट मिळाला. बहुजन विकास आघाडीच्या प्रस्तावित सायंकाळच्या कार्यक्रमाला विरोध दर्शवत भाजपचे पदाधिकारी व नगरसेवक संकुलाच्या आवारातच ठिय्या आंदोलनाला बसले होते.
सायंकाळी सुमारे साडेसहा वाजता बहुजन विकास आघाडीतर्फे क्रीडासंकुल आणि नाट्यगृहाचे अधिकृत उद्घाटन पार पडले. या वेळी बोलताना माजी आमदार हितेंद्र ठाकूर यांनी भाजपवर जोरदार टीका केली. ‘श्रेय घेण्यासाठी मेहनत करावी लागते, केवळ रील्स बनवून चालत नाही,’ असा टोला ठाकूर यांनी या वेळी लगावला. एकाच दिवशी, एकाच स्पोर्ट्स कॉम्प्लेक्सचे दोन वेगवेगळ्या राजकीय पक्षांकडून झालेले उद्घाटन आणि दोन्ही ठिकाणी एकाच व्यक्तीच्या हस्ते फीत कापण्याची घटना या राजकीय संघर्षातील चर्चेचा विषय ठरली आहे.
