प्रतिनिधी, 14 ऑक्टोबर: उत्तर प्रदेश विधानसभा निवडणुकीच्या तोंडावर इंडिया आघाडीचा घटक पक्ष असलेल्या समाजवादी पक्षाला (सपा) मोठा धक्का बसला आहे. समाजवादी पक्षाच्या तीन विद्यमान आमदारांनी भाजपमध्ये प्रवेश केला असून, यामुळे आगामी काळातील राजकीय समीकरणे बदलण्याची शक्यता निर्माण झाली आहे.
भाजपमध्ये प्रवेश करणाऱ्यांमध्ये गौरीगंज विधानसभा मतदारसंघातून सलग तीन वेळा निवडून आलेले आमदार राकेश प्रताप सिंह, अयोध्या जिल्ह्यातील गोसाईगंजचे आमदार अभय सिंह आणि कालपी मतदारसंघाचे आमदार विनोद चतुर्वेदी यांचा समावेश आहे. भाजपच्या राष्ट्रीय महामंत्री स्मृती इराणी आणि प्रदेशाध्यक्ष पंकज चौधरी यांच्या उपस्थितीत हा पक्षप्रवेश पार पडला. या सोहळ्याला भाजपचे इतर आमदार आणि हजारो कार्यकर्ते उपस्थित होते.
या कार्यक्रमात बोलताना आमदार विनोद चतुर्वेदी यांनी अयोध्या येथील राम मंदिराच्या उभारणीवरून केंद्रातील मोदी सरकारचे कौतुक केले. तसेच, भाजपच्या सत्ताकाळात बुंदेलखंडचा विकास झाल्याचेही ते म्हणाले. 'जेव्हा राम मंदिराचे उद्घाटन झाले, तेव्हा आमच्या हायकमांडने आम्हाला त्या कार्यक्रमाला उपस्थित राहण्याची परवानगी दिली नव्हती,' असे चतुर्वेदी यांनी यावेळी स्पष्ट केले.
लोकसभा निवडणुकीत जागा कमी होऊनही भाजपने सलग तिसऱ्यांदा केंद्रात मजबूत सरकार स्थापन केले. यानंतर झालेल्या विधानसभा निवडणुकांमध्येही भाजपने यश मिळवले. महाराष्ट्रात महाविकास आघाडीला धक्का देत भाजप सर्वात मोठा पक्ष ठरला, तर पश्चिम बंगालमध्ये ममता बॅनर्जी यांच्या तृणमूल काँग्रेसचा पराभव करून सत्ता स्थापन केल्याचे पाहायला मिळाले. या पार्श्वभूमीवर आता इंडिया आघाडीतील अनेक नेते एनडीएमध्ये प्रवेश करत असून, ऐन निवडणुकीपूर्वी सपाचे तीन बडे नेते भाजपमध्ये गेल्याने पक्षाच्या अडचणी वाढल्या आहेत.
