प्रतिनिधी, 13 ऑक्टोबर: बॉलिवूड अभिनेत्री सेलिना जेटली सध्या तिच्या वैयक्तिक आयुष्यातील अत्यंत कठीण प्रसंगाला सामोरी जात आहे. तिनं ऑस्ट्रियन व्यावसायिक असलेला पती पीटर हाग याच्यावर घरगुती हिंसाचाराचे आणि मानसिक छळाचे गंभीर आरोप केले आहेत. सध्या ती आपल्या तीन मुलांचा ताबा मिळवण्यासाठी कायदेशीर लढा देत असून, सोशल मीडियावरील एका पोस्टद्वारे तिनं ही आपबिती मांडली आहे.
सप्टेंबर २०२५ च्या सुरुवातीला लग्नाच्या १५ व्या वाढदिवसानिमित्त पतीकडून एखादी भेटवस्तू मिळेल, अशी सेलिनाला अपेक्षा होती. मात्र, पोस्ट ऑफिसमध्ये गेल्यावर तिच्या हाती थेट घटस्फोटाची नोटीस पडली. या अनपेक्षित धक्क्यामुळे ती भावनिकदृष्ट्या पूर्णपणे कोलमडून गेली आणि येथूनच पुढील कायदेशीर वादाची सुरुवात झाली.
मुलांच्या भल्यासाठी परस्पर संमतीनं विभक्त होण्याची विनंती तिनं पतीकडे केली होती, मात्र ती संधी तिला नाकारण्यात आली. त्यानंतर १२ ऑक्टोबर रोजी महत्त्वाचे दस्तऐवज, दिवंगत आईच्या साड्या आणि अनेक भावनिक आठवणी असलेली सुटकेस घेऊन ती मुंबईत परतली. हा आपल्या आयुष्यातील सर्वात कठीण निर्णय असल्याचं तिने म्हटलं आहे.
पहिल्या घटस्फोटाच्या सुनावणीवेळी न्यायाधीशांनी नोव्हेंबरपर्यंत परस्पर संमतीनं मार्ग काढण्याची मुदत दिली होती. मात्र, कायदेशीर लढाईसाठी पैसे नसल्याचं तिनं सांगितल्यावर, तिला वकिलांशी बोलण्यास सांगण्यात आलं. शिवाय, पैसे संपले तर स्वच्छता कर्मचारी म्हणून काम करण्याचा सल्लाही तिला देण्यात आला. ऑस्ट्रियातील संयुक्त बँक खात्यांचा वापर करण्यासही तिला मज्जाव करण्यात आला होता. तसंच, लग्नापूर्वी भारतातील तिच्या मालकीच्या मालमत्ता विकण्याचे प्रयत्नही सुरू असल्याचा तिचा दावा आहे.
मुलांच्या संपर्कात राहायचं असेल, तर ऑस्ट्रिया सोडून जाता येणार नाही, असं सेलिनाला सांगण्यात आलं होतं. तिच्यावर सतत पाळत ठेवून तिला मानसिक त्रास देण्याचे प्रयत्न सुरू होते. यादरम्यान तिला तिच्या भावाच्या परिस्थितीचीही चिंता सतावत होती. अखेर ऑस्ट्रियातील शेजाऱ्यांच्या मदतीने ती रात्री १ वाजता तिथून बाहेर पडली. त्यानंतर एक आठवडा हॉटेलमध्ये राहून तिने फोन आणि झूमच्या माध्यमातून मुलांशी संपर्क ठेवला.
सेलिना जेटली आणि पीटर हाग यांचा विवाह २०१० मध्ये हैदराबाद येथे झाला होता. त्यांना तीन मुले आहेत. नोव्हेंबर २०२५ मध्ये तिनं मुंबईतील न्यायालयात घटस्फोटासाठी अर्ज दाखल केला आहे. सध्या त्यांच्यात हा कायदेशीर लढा सुरू असून, सेलिनाच्या या खुलाशामुळे त्यांच्यातील वैवाहिक वाद पुन्हा चर्चेत आला आहे.
