प्रतिनिधी, 13 ऑक्टोबर: दिल्लीत सुरू असलेल्या ‘इंडिया’ आघाडीच्या आंदोलनाच्या पार्श्वभूमीवर, प्रसिद्ध गायिका सोना मोहपात्रा यांनी काँग्रेस नेते राहुल गांधी यांच्यावर निशाणा साधला आहे. देशातील लोकशाही सुधारण्याविषयी बोलण्यापूर्वी काँग्रेसने आधी आपल्या ताब्यातील हिमाचल प्रदेशाची स्थिती सुधारावी, असा सल्ला त्यांनी दिला आहे.
नऊ वर्षांनंतर हिमाचल प्रदेशला भेट दिल्यानंतर मोहपात्रा यांनी तिथल्या निसर्गरम्य दऱ्या, डोंगर आणि नद्यांमधील वाढत्या प्रदूषणावर चिंता व्यक्त केली. पर्वतरांगांमध्ये साचलेला कचरा आणि घाणेरड्या नद्यांचा संदर्भ देत त्यांनी काँग्रेसच्या सुशासनाच्या दाव्यांवर प्रश्नचिन्ह निर्माण केले. जनतेचा विश्वास आणि पाठिंबा हवा असेल, तर पक्षाने आधी स्वतःचे प्रशासन सिद्ध करून दाखवावे, असेही त्या म्हणाल्या.
सोशल मीडियावरील पोस्टद्वारे राहुल गांधींना थेट उद्देशून सोना मोहपात्रा यांनी लिहिले आहे की, "प्रिय राहुल गांधी, लोकशाही सुधारण्याआधी, तुम्ही आधी हिमाचल प्रदेश सुधारू शकता का? मी ९ वर्षांनंतर येथे परत आले आहे आणि कचऱ्याचे ढीग आणि घाणेरड्या नद्या पाहून मला धक्का बसला आहे. केवळ मागण्या करू नका, लोकांच्या आदरास पात्र व्हा. ज्ञानेश कुमार जातील. हे सरकार जाईल. मग लोकशाहीच्या दुरुस्तीला सुरुवात होईल."
मोहपात्रा यांच्या या भूमिकेवर सोशल मीडिया युजर्सकडूनही विविध प्रतिक्रिया उमटल्या आहेत. एका युजरने राहुल गांधींना हिमाचल प्रदेश, कर्नाटक, तेलंगणा आणि केरळ या राज्यांना आदर्श बनवण्याचा सल्ला दिला. तसेच, स्वतःची क्षमता सिद्ध करण्यासाठी त्यांनी यापैकी एका राज्याचे मुख्यमंत्री व्हावे, अशीही अपेक्षा व्यक्त केली आहे. तर दुसऱ्या एका युजरने 'तुमची मागणी योग्य आहे, पण तुलना नाही', अशी प्रतिक्रिया नोंदवली आहे.
