ठाणे, 13 ऑक्टोबर: ठाण्यात खळबळ उडवून देणाऱ्या प्रदीप पूर्णेकर हत्या प्रकरणात आता नवा खुलासा झाला आहे. हत्येपूर्वी प्रदीप पूर्णेकरांनी स्वतःच्या जीवाला धोका असल्याची भीती व्यक्त करणारा एक जुना व्हिडिओ सध्या व्हायरल होत आहे. या व्हिडिओच्या पार्श्वभूमीवर, ठाण्यातील माजी महापौर मीनाक्षी शिंदे यांची पोलिसांकडून चौकशी केली जाणार असल्याची माहिती सूत्रांनी दिली आहे.
पूर्णेकर यांच्या हत्येमागे राजकीय वैमनस्य असल्याचा आणि यात मीनाक्षी शिंदे तसेच त्यांचे पती राजा शिंदे यांचा हात असल्याचा गंभीर आरोप पूर्णेकर कुटुंबीयांनी वारंवार केला आहे. याच आरोपांच्या अनुषंगाने आज राजा शिंदे यांची तब्बल ७ तास चौकशी करण्यात आली. त्यानंतर आता मीनाक्षी शिंदे यांनाही चौकशीसाठी बोलावण्यात येणार असल्याचे ठाणे पोलीस सूत्रांनी स्पष्ट केले आहे.
प्रदीप पूर्णेकर यांची पुतणी खुशबू पूर्णेकर यांनी सोशल मीडियावर हा जुना व्हिडिओ शेअर केला आहे. यामध्ये, 'माझ्या जीवाला काही बरं वाईट झालं तर त्याला टीएमसी, पोलीस प्रशासन आणि मीनाक्षी शिंदे जबाबदार असतील,' असा जाहीर आरोप पूर्णेकरांनी केल्याचे दिसत आहे. टीव्ही ९ मराठीने या व्हिडिओची पुष्टी केलेली नाही, मात्र हा व्हिडिओ पाच महिन्यांपूर्वीचा असल्याचे सांगण्यात येत आहे.
या वादाचे मूळ मनोरमा नगर येथील महादेव मंदिराजवळील एका मोकळ्या जागेत आहे. तिथे पूर्णेकर यांनी एक कंटेनर ठेवला होता. त्या कंटेनरबाबत मीनाक्षी शिंदे यांनी महापालिकेकडे तक्रार केली होती. त्यानंतर पालिका प्रशासनाने कारवाई केली असता, पूर्णेकरांनी प्रसारमाध्यमांना ही प्रतिक्रिया दिली होती. आता हाच व्हिडिओ समोर आल्याने या हत्येच्या तपासाला नवे वळण मिळाले आहे.
