प्रतिनिधी, 13 ऑक्टोबर: अभिनेत्री तनुश्री दत्ता सध्या नाना पाटेकर यांच्यावर केलेल्या वक्तव्यांमुळे चर्चेत असतानाच, तिचा एक जुना मुलाखतीचा व्हिडीओ व्हायरल होत आहे. आपल्या स्पष्टवक्तेपणासाठी ओळखल्या जाणाऱ्या तनुश्रीने या मुलाखतीत इंडस्ट्रीतील अनेक गोष्टी उघड केल्या असून, एका चित्रपटाच्या सेटवर दिग्दर्शकाने तिच्याशी केलेल्या गैरवर्तनाचा धक्कादायक अनुभव सांगितला आहे.
'पिंकविला'ला दिलेल्या या मुलाखतीत तनुश्रीने स्पष्ट केले की, तिला केवळ नाना पाटेकर यांच्याकडूनच वाईट अनुभव आला नाही, तर 'चॉकलेट' चित्रपटाच्या शूटिंगदरम्यानही असाच प्रसंग ओढवला होता. या चित्रपटात पाण्याखालील एका डान्स सिक्वेन्सचे शूटिंग सुरू असताना दिग्दर्शकाने तिच्याशी अत्यंत अश्लील भाषेत संवाद साधल्याचा खुलासा तिने केला.
या प्रसंगाविषयी सांगताना तनुश्री म्हणाली, "त्याने मला थेट माझे कपडे काढून नाचायला सांगितले. त्या सीनसाठी मला माझा गाऊन काढावा लागणार होता, पण हीच गोष्ट तो नम्रपणे सांगू शकला असता." आपण मिस इंडियाच्या पार्श्वभूमीवरून आणि एका सभ्य कुटुंबातून आलो आहोत, तसेच आपल्या हाताखालच्या कर्मचाऱ्यांशीही आपण नम्रपणे बोलतो, त्यामुळे पहिल्याच चित्रपटाच्या सेटवर दिग्दर्शकाने केलेली ही उद्धटपणाची वागणूक अजिबात आवडली नसल्याचे तिने नमूद केले. मिस इंडिया किंवा कोणत्याही व्यक्तीशी असे बोलणे योग्य नसल्याचेही ती म्हणाली.
तनुश्रीने पुढे सांगितले की, आपण त्यावेळी नवीन असल्याने काहीही बोललो नाही. दिग्दर्शकाकडे एकटक पाहत तिने शांतपणे तो सीन पूर्ण केला. मात्र, दिग्दर्शकाच्या या बोलण्यामुळे सेटवर उपस्थित असलेल्या इतर लोकांनाही वाईट आणि अपमानकारक वाटले होते. आपण या घटनेचे तेव्हा भांडवल केले नाही आणि माध्यमांशी बोलताना हा विषय सहजच समोर आल्याचे ती म्हणाली.
विशेष म्हणजे, तनुश्रीने त्यावेळी दिग्दर्शकाचे नाव घेतले नव्हते. मात्र, तो स्वतःच समोर आला, त्याने स्पष्टीकरण दिले आणि तो अंगावर धावून आल्याचे तिने सांगितले. आजही तो याविषयी वाट्टेल ते मूर्खपणाचे बोलत असल्याचे तिने स्पष्ट केले. दरम्यान, 'चॉकलेट' या चित्रपटाचे दिग्दर्शन विवेक अग्निहोत्री यांनी केले होते. तसेच, या मुलाखतीत तनुश्रीने नानांच्या नावाचा उल्लेख केला नसला तरी, ज्यांना तिचा इशारा समजायचा होता, त्यांना तो समजल्याचे म्हटले आहे.
