प्रतिनिधी, 13 ऑक्टोबर: राज्यात यंदा समाधानकारक पाऊस न झाल्याने शेतीचा प्रश्न अत्यंत गंभीर बनला आहे. सर्वांना परतीच्या पावसाकडून मोठ्या अपेक्षा होत्या, मात्र तोही समाधानकारक झाला नाही. त्यातच आता भारतीय हवामान विभागाने उष्णता वाढीचा इशारा देत 'यलो अलर्ट' जारी केला आहे. हवामान विभागाच्या अंदाजानुसार, कोकणात उष्ण आणि दमट हवामान राहणार आहे.
सध्या राज्यात ऑक्टोबर महिन्यातच एप्रिलसारखी उन्हाची तीव्रता जाणवू लागली आहे. मन्नारच्या आखाताजवळ समुद्रसपाटीपासून चक्राकार वाऱ्यांची स्थिती निर्माण झाली आहे. यामुळे राज्यातील तापमानात कमालीची वाढ झाली असून, दुपारच्या वेळी कडाक्याच्या उन्हामुळे घराबाहेर पडणेही कठीण झाले आहे.
पुढील काही दिवस राज्यात उष्णता आणखी वाढण्याची शक्यता आहे. पावसाने पाठ फिरवल्याने आधीच शेतीच्या समस्येत भर पडली आहे. त्यातच आता २०२७ च्या मान्सूनमध्ये 'एल निनो'चे संकट अधिक तीव्र होण्याचा अंदाज वर्तवण्यात आला आहे. त्यामुळे आगामी काळात पिण्याच्या पाण्याचाही अतिशय गंभीर प्रश्न निर्माण होण्याची भीती व्यक्त केली जात आहे.
