प्रतिनिधी, 4 ऑक्टोबर: विधान परिषदेच्या आगामी निवडणुकीसाठी महाविकास आघाडीतील जागावाटपाचा तिढा अद्याप सुटलेला नाही. या प्रश्नावर झालेल्या बैठकीत कोणताही अंतिम निर्णय होऊ शकला नसून, आता शनिवारी संध्याकाळी पुन्हा बैठक घेऊन मार्ग काढण्याची शक्यता आहे. काँग्रेसने आघाडीत एकत्रित निर्णय घेण्याऐवजी परस्पर उमेदवार जाहीर केल्याने मविआमध्ये नाराजीचे वातावरण निर्माण झाले आहे.
अमरावती आणि पुण्यासह मराठवाडा पदवीधर मतदारसंघाच्या जागेवरून आघाडीत मुख्य वाद आहे. मराठवाडा पदवीधर मतदारसंघावर राष्ट्रवादी काँग्रेस (शरदचंद्र पवार गट) आणि शिवसेना (उद्धव बाळासाहेब ठाकरे गट) या दोन्ही पक्षांनी दावा सांगितला आहे. दरम्यान, शिक्षक मतदारसंघ आणि मराठवाडा पदवीधर मतदारसंघ या दोन जागा शिवसेना (ठाकरे गट) लढवणार असल्याची घोषणा संजय राऊत यांनी केली असून, उमेदवारांची नावेही लवकरच अपेक्षित आहेत.
काँग्रेसने अमरावती, नागपूर आणि पुणे विभाग शिक्षक मतदारसंघासाठी आपले उमेदवार जाहीर केले आहेत. एकत्रितपणे उमेदवारी घोषित करण्याऐवजी काँग्रेसने केंद्रीय प्रभारींसोबतच्या बैठकीनंतर थेट उमेदवार जाहीर केल्याने हा वाद उफाळून आला आहे. जागावाटपावर तोडगा न निघाल्यास काय भूमिका घेणार, याबाबत बोलताना संजय राऊत यांनी, ‘जर एकमत होत नसेल, तर मैत्रीपूर्ण लढतीसाठी आम्ही तयार आहोत,’ असे स्पष्ट केले आहे.
