प्रतिनिधी, 13 ऑक्टोबर: अजय देवगणच्या 'दृश्यम ३' सिनेमाने बॉक्स ऑफिसवर धुमाकूळ घातला असून, आता दाक्षिणात्य सुपरस्टार मोहनलाल यांनीही या चित्रपटाचे तोंडभरून कौतुक केले आहे. मल्याळममधील मूळ ‘दृश्यम’ सीरिजमध्ये 'जॉर्जकुट्टी'ची प्रमुख भूमिका साकारणाऱ्या मोहनलाल यांनी सोशल मीडियावर एक व्हिडीओ शेअर करत हिंदी व्हर्जनच्या प्रवासाचा शेवट अतिशय प्रभावी झाल्याचे म्हटले आहे.
सिनेमा पाहिल्यानंतर प्रतिक्रिया देताना मोहनलाल म्हणाले, "मी 'दृश्यम- द कन्क्लूजन' सिनेमा पाहिला आहे. ज्या पद्धतीने मेकर्सनी या प्रवासाचा शानदार शेवट केला आहे, ते पाहून मी खूप प्रभावित झालो आहे." यासोबतच त्यांनी अभिषेक पाठक, कुमार मंगत पाठक आणि अजय देवगण यांच्यासह चित्रपटाच्या संपूर्ण कास्ट आणि क्रूचे अभिनंदन केले. विशेष म्हणजे, सिनेमा रिलीज होण्यापूर्वी अजय देवगणनेही मोहनलाल यांनी हा चित्रपट पाहावा अशी इच्छा व्यक्त केली होती.
सध्या हा चित्रपट सर्वत्र हाऊसफुल्ल गर्दी खेचत आहे. रिलीजच्या ११ दिवसांनंतरही सिनेमाची दमदार कमाई सुरू असून, भारतातील नेट कलेक्शन ३१५ कोटी रुपयांच्या पुढे गेले आहे. तर जगभरातील ग्रॉस कलेक्शन ४८९ कोटींवर पोहोचले आहे. समीक्षक आणि चाहत्यांची पसंती मिळवणारा हा यंदाच्या वर्षातील दुसरा सर्वाधिक कमाई करणारा हिंदी सिनेमा ठरला आहे.
हिंदीत तयार झालेला 'दृश्यम ३' हा मल्याळमच्या 'दृश्यम ३' पेक्षा कथेच्या बाबतीत पूर्णपणे वेगळा आहे. मल्याळम व्हर्जनची कथा आणि सस्पेन्स कमकुवत असल्याचे म्हणत त्याला संमिश्र प्रतिक्रिया मिळाल्या होत्या. मात्र, त्याउलट हिंदी सिनेमाच्या क्लायमॅक्सचे प्रेक्षकांकडून प्रचंड कौतुक होत असून तो मल्याळमपेक्षा सरस असल्याचा दावा सोशल मीडियावर काही प्रेक्षकांनी केला आहे.
'दृश्यम: द कन्क्लूजन'मध्ये अजय देवगणने विजय साळगावकर ही व्यक्तिरेखा साकारून पुन्हा एकदा प्रेक्षकांची मने जिंकली आहेत. या चित्रपटात त्याच्यासोबत तब्बू (मीरा देशमुख), श्रिया सरन, रजत कपूर, जयदीप अहलावत, प्रकाश राज, कमलेश सावंत, इशिता दत्ता आणि मृणाल जाधव यांनीही महत्त्वाच्या भूमिका साकारल्या आहेत. आगामी काळात हा सिनेमा कमाईचे आणखी कोणते टप्पे गाठतो, हे पाहणे महत्त्वाचे ठरणार आहे.
