प्रतिनिधी, 13 ऑक्टोबर: भजन सम्राट अनूप जलोटा यांनी त्यांच्यापेक्षा ३७ वर्षांनी लहान असलेल्या जसलीन मथारूसोबतच्या अफेअरच्या चर्चांवर पुन्हा एकदा मौन सोडले आहे. 'बिग बॉस १२' च्या दरम्यान सुरू झालेल्या या चर्चा केवळ टीआरपीसाठी केलेला ड्रामा होता, असा खुलासा ७३ वर्षीय जलोटा यांनी एका ताज्या मुलाखतीत केला आहे.
आध्यात्मिक पार्श्वभूमी असतानाही अफेअरच्या बातम्या आणि ट्रोलिंगचा सामना कसा केला, या प्रश्नावर जलोटा यांनी स्पष्टीकरण दिले. ते म्हणाले की, लोक काय म्हणतात याने काहीही फरक पडत नाही कारण त्या लोकांशी आपला काहीही संबंध नसतो. बिग बॉसमधून बाहेर आल्यावर त्यांनी सर्वात आधी आपल्या आईची भेट घेतली होती. त्यावेळी त्यांच्या आईनेच जसलीन कोण आहे, असा प्रश्न विचारल्याचे जलोटा यांनी सांगितले. घरात कोणालाही तिच्याबद्दल माहिती नव्हती, हा सर्व प्रकार केवळ टीआरपी मिळवण्यासाठी रचलेला होता, असे ते म्हणाले.
या संपूर्ण प्रकरणाची सुरुवात 'बिग बॉस १२' मध्ये झाली होती. या शोमध्ये दोघांनी जोडीने प्रवेश केला होता. शोमध्ये जाण्यापूर्वीच मंचावर जसलीनने आपण अनूप जलोटा यांच्यासोबत रिलेशनशिपमध्ये असल्याचा दावा केला होता. या दाव्यानंतर मोठी खळबळ उडाली होती आणि मुलीच्या वयाच्या जसलीनसोबत नाव जोडले गेल्याने जलोटा यांना सोशल मीडियावर प्रचंड ट्रोलिंगचा सामना करावा लागला होता.
मात्र, शोमधून बाहेर आल्यावर या दोघांनीही या नात्याला नकार दिला. चर्चेत राहण्यासाठीच आपण प्रेमाचे खोटे नाटक केल्याची कबुली नंतर जसलीनने दिली होती. अनूप जलोटा यांच्या वैयक्तिक आयुष्याबाबत सांगायचे तर, त्यांनी तीन वेळा लग्न केले असून तिन्ही लग्नांचा शेवट दुःखद झाला. आता ते कोणाच्याही प्रेमात पडू इच्छित नसून सिंगल राहून आपले आयुष्य आनंदाने जगत आहेत.
