प्रतिनिधी, 14 ऑक्टोबर: 'तारक मेहता का उल्टा चष्मा' या लोकप्रिय मालिकेतून घराघरात पोहोचलेली 'बबिताजी' अर्थात अभिनेत्री मुनमुन दत्ता सध्या तिच्या कोणत्याही नव्या मालिकेमुळे नाही, तर आलिशान घरातील नवरात्रीच्या पूजेमुळे चर्चेत आली आहे.
मुनमुनने सोशल मीडियावर शेअर केलेल्या फोटो आणि व्हिडीओंमधून तिच्या सुंदर घराची झलक चाहत्यांना पाहायला मिळत आहे. या नवरात्रीच्या निमित्ताने तिने आपल्या घरी कलश स्थापना करत पारंपरिक पद्धतीने देवीची पूजा केली. यावेळी तिने हवनकुंडात आहुती देत प्रदक्षिणा घातली आणि पूजेनंतर संपूर्ण घरात धूपही दाखवला. या धार्मिक कृतींमधून तिची परंपरांवरील आस्था दिसून येत आहे.
या खास प्रसंगी मुनमुन दत्ताने निळ्या रंगाची साडी नेसली होती. कानात मोठे झुमके, केसांचा पारंपरिक अंबाडा आणि कपाळावर टिळा असा तिचा अतिशय साधा पण आकर्षक लूक सोशल मीडियावर चाहत्यांचे लक्ष वेधून घेत आहे.
वयाच्या ३९ व्या वर्षीही मुनमुन सिंगल आहे. वैयक्तिक आयुष्याबाबत फारशी उघडपणे न बोलणारी ही अभिनेत्री सध्या तिची आई आणि दोन पाळीव मांजरींसोबत या घरात अतिशय रॉयल आयुष्य जगत आहे. या घरातील प्रत्येक कोपरा तिने स्वतःच्या आवडीनुसार सजवला आहे. पांढऱ्या, ग्रे आणि सोनेरी रंगांच्या छटांचा वापर करून घराला एक आधुनिक व आलिशान लूक देण्यात आला आहे. घरातील आकर्षक फर्निचरपासून ते भिंतींवरील पेंटिंग्जपर्यंत अनेक गोष्टींची निवड तिने स्वतः केली आहे.
आज तिच्याकडे स्वतःच्या हक्काचं आणि मेहनतीच्या पैशातून खरेदी केलेलं घर असलं, तरी तिचा हा इथपर्यंतचा प्रवास सोपा नव्हता. मुंबईत करिअरच्या सुरुवातीच्या काळात तिला मोठ्या आर्थिक अडचणींचा सामना करावा लागला. एक काळ असाही होता जेव्हा तिच्याकडे घराचं भाडं देण्यासाठीही पैसे नसत. मात्र, स्वतःच्या जिद्दीच्या आणि अभिनयाच्या जोरावर तिने काही वर्षांपूर्वी स्वतःच्या कमाईतून मुंबईत हे घर खरेदी केले असून, तिला या वास्तूचा सार्थ अभिमान आहे.
