प्रतिनिधी, 13 ऑक्टोबर: ९० च्या दशकात दूरदर्शनवर प्रसारित होणाऱ्या एका मालिकेने प्रेक्षकांना अक्षरशः वेड लावले होते. 'शक्तिमान' या सुपरहिरोच्या मालिकेची क्रेझ इतकी जबरदस्त होती की, ती पाहण्यासाठी शाळकरी मुले चक्क शाळा बुडवायची. या वाढत्या लोकप्रियतेमुळे शेवटी या मालिकेच्या प्रसारणाच्या वेळेतही बदल करावा लागला होता.
१९९७ मध्ये सुरू झालेली ही मालिका सुरुवातीला शनिवारी दुपारी दाखवली जायची. मात्र, मालिकेच्या वेळेत शाळा असल्याने अनेक मुले शाळेला दांडी मारून टीव्हीसमोर बसायची. मुलांचे शैक्षणिक नुकसान होऊ नये म्हणून यावर तोडगा काढण्यात आला आणि 'शक्तिमान'चे प्रसारण शनिवारऐवजी रविवारच्या सुट्टीच्या दिवशी दुपारी करण्यात येऊ लागले.
अभिनेते मुकेश खन्ना यांनी या मालिकेत 'शक्तिमान'ची मुख्य भूमिका साकारली होती. त्यांच्या साहसी कथा आणि वाईट प्रवृत्तींविरुद्धचा लढा पाहण्यासाठी केवळ लहान मुलेच नाही, तर मोठी माणसेही घरातील कामे लवकर उरकून टीव्ही लावून बसायची. सत्याच्या मार्गावर चालण्याचा संदेश देणाऱ्या या कार्यक्रमाने घराघरात आपली ओळख निर्माण केली होती.
दिनकर जानी यांनी या मालिकेचे दिग्दर्शन केले होते. १९९७ सालापासून ते २००५ पर्यंत तब्बल आठ वर्षे या मालिकेने भारतीय टेलिव्हिजनवर राज्य केले. या काळात 'शक्तिमान'चे जवळपास ४०० भाग प्रसारित झाले. आजही या मालिकेचे नाव काढले की ९० च्या दशकातील प्रेक्षकांच्या जुन्या आठवणी ताज्या होतात.
