मुंबई, 13 ऑक्टोबर: मुंबईतील शिवाजी पार्क आणि सेना भवन परिसरात रविवारी झालेल्या आंदोलनात तेजस ठाकरे यांची आक्रमक भूमिका पाहायला मिळाली. आदित्य ठाकरे यांच्यासोबत ते सेना भवन परिसरात दाखल झाले आणि पोलिसांच्या ताब्यात असलेल्या कार्यकर्त्यांच्या सुटकेसाठी त्यांनी थेट ठिय्या आंदोलनात सहभाग घेतला. या घटनेनंतर ठाकरे घराण्यातील आणखी एक सदस्य आता सक्रिय राजकारणात उतरणार का, या चर्चांना उधाण आले आहे.
११ ऑक्टोबर रोजी कॉकरोच जनता पार्टीच्या वतीने या परिसरात आंदोलन करण्यात आले. यामध्ये शिवसेना (ठाकरे गट) आणि मनसेचे कार्यकर्ते मोठ्या संख्येने सहभागी झाले होते. पोलिसांनी आंदोलकांना ताब्यात घेण्यास सुरुवात केल्यानंतर ठाकरे गटाचे नेते आक्रमक झाल्याचे पाहायला मिळाले. यावेळी राजकारणापासून सहसा दूर राहणाऱ्या तेजस ठाकरे यांनी कार्यकर्त्यांसाठी घेतलेली आक्रमक भूमिका अनेकांचे लक्ष वेधून घेणारी ठरली.
उद्धव ठाकरे यांचे धाकटे चिरंजीव असलेले तेजस प्रामुख्याने वन्यजीव संशोधन आणि जैवविविधता क्षेत्रातील त्यांच्या महत्त्वपूर्ण कामांसाठी ओळखले जातात. त्यांचे मोठे बंधू आदित्य ठाकरे यांनी विद्यार्थी संघटनेपासून ते निवडणूक राजकारणापर्यंत सक्रिय सहभाग नोंदवला आहे. मात्र, तेजस यांची सार्वजनिक प्रतिमा कायमच राजकारणापासून दूर असलेल्या व्यक्तीची राहिली आहे.
असे असले तरी, तेजस ठाकरे यापूर्वीही काही महत्त्वाच्या राजकीय घडामोडींमध्ये दिसले आहेत. २०२४ च्या लोकसभा निवडणुकीत उद्धव ठाकरे यांच्यासोबत, तर विधानसभा प्रचारात आदित्य ठाकरे यांच्यासोबत त्यांनी हजेरी लावली होती. आदित्य ठाकरे यांचे निकटवर्तीय सूरज चव्हाण तुरुंगातून सुटून मातोश्रीवर आले, त्यावेळीही तेजस तिथे उपस्थित होते. तसेच दसरा मेळावा आणि पक्षाच्या वर्धापन दिनाला ते अनेकदा मंचासमोर बसलेले पाहायला मिळाले आहेत.
मराठीच्या मुद्द्यावर दोन्ही ठाकरे बंधूंनी एकत्र घेतलेल्या पहिल्या सभेत आणि माजी महापौर किशोरी पेडणेकर यांच्यासोबतच्या व्हायरल व्हिडिओमध्येही तेजस यांची उपस्थिती चर्चेत होती. मुंबई महापालिकेच्या प्रचारादरम्यान शाखा भेटी, तसेच 'नीट' पेपरफुटीविरोधात शिवाजी पार्कवर झालेल्या आंदोलनातही ते सहभागी झाले होते. आता थेट कार्यकर्त्यांच्या सुटकेसाठी रस्त्यावर उतरल्याने त्यांच्या राजकीय प्रवेशाबाबत तर्कवितर्क लावले जात असले, तरी याबाबत अद्याप कोणतीही अधिकृत माहिती समोर आलेली नाही.
